जाजरकोटमा बाढीको वितण्डा चार घरसहित झोलुंगे पुल बगायो जाजरकोट–डोल्पा सडक अवरुद्ध

काठमाडौँ । अविरल वर्षाका कारण जाजरकोटमा बाढी तथा पहिरोको जोखिम बढेको छ। गएराति जिल्लाको नलगाड नगरपालिका–१० स्थित तासुघाटमा आएको बाढीले चार वटा घर, एउटा खाजा पसल र झोलुंगे पुल बगाएको छ।

बाढीले ठूलो भौतिक क्षति पुर्‍याए पनि घटनामा हालसम्म मानवीय क्षति भने नभएको सशस्त्र प्रहरी बलले जनाएको छ। सशस्त्र प्रहरी बलका नायब उपरीक्षक एवं सहप्रवक्ता शैलेन्द्र थापाका अनुसार बाढीका कारण भेरी करिडोरअन्तर्गतको जाजरकोट–डोल्पा सडकखण्ड पूर्ण रूपमा अवरुद्ध भएको छ।

सडक अवरुद्ध भएपछि त्यस क्षेत्रमा यातायात आवागमनसमेत प्रभावित भएको छ। बाढीका कारण सडक तथा आसपासका क्षेत्रमा थप क्षति भएको हुनसक्ने भएकाले विस्तृत विवरण संकलनको काम भइरहेको प्रहरीले जनाएको छ।

घटनालगत्तै उद्धार तथा खोजीका लागि सुरक्षाकर्मी परिचालन गरिएको छ। जाजरकोटको दल्लीस्थित सशस्त्र प्रहरीको अस्थायी मनसुन विपद् व्यवस्थापन बेसबाट प्रहरी जनशक्ति प्रभावित क्षेत्रतर्फ पठाइएको छ। त्यस्तै, स्थानीय प्रहरी चौकीबाट समेत प्रहरी टोली घटनास्थलमा खटाइएको सशस्त्र प्रहरीले जनाएको छ।

अविरल वर्षाका कारण तासुघाटलगायत आसपासका क्षेत्रमा थप बाढी तथा पहिरो आउन सक्ने जोखिम रहेकाले स्थानीय बासिन्दालाई सतर्क रहन आग्रह गरिएको छ। प्रभावित क्षेत्रमा सुरक्षाकर्मीले अवस्था निरीक्षण गर्नुका साथै क्षतिको विवरण संकलन र आवश्यक उद्धार तथा व्यवस्थापनका लागि तयारी गरिरहेका छन्।

सशस्त्र प्रहरीका अनुसार बाढीबाट भएको क्षतिको पूर्ण विवरण अझै प्राप्त भइसकेको छैन। घटनास्थलको अवस्था र थप क्षतिको विवरण संकलन भएपछि मात्र क्षतिको यकिन विवरण सार्वजनिक हुने जनाइएको छ।

जाजरकोट–डोल्पा सडकखण्ड अवरुद्ध भएपछि दुर्गम क्षेत्रको आवागमनमा थप समस्या उत्पन्न भएको छ। वर्षा नरोकिए सडक तथा पुलमा थप क्षति पुग्न सक्ने भएकाले स्थानीय प्रशासन तथा सुरक्षा निकायले सम्भावित जोखिमलाई ध्यानमा राखेर निगरानी बढाएका छन्।