काठमाडौं — नेपाली कांग्रेसका राष्ट्रियसभा सदस्य रञ्जित कर्णले आफूविरुद्ध सामाजिक सञ्जालमा फैलाइएको अपमानजनक तथा भ्रामक सामग्रीबारे साइबर अपराध अन्तर्गत उजुरी दिएका छन्। उनले नेपाल प्रहरीको साइबर ब्युरो मा पुगेर औपचारिक निवेदन दर्ता गराएका हुन्।

कर्णका अनुसार केही व्यक्तिहरूले फेसबुक लगायतका सामाजिक सञ्जालमार्फत उनको चरित्र हत्या गर्ने उद्देश्यले झुट्टा सूचना र अपशब्द प्रयोग गर्दै सामग्री पोस्ट गरिरहेका छन्। यसले व्यक्तिगत प्रतिष्ठामा गम्भीर असर परेको भन्दै उनले दोषीमाथि कानुनी कारबाही गर्न माग गरेका छन्।

कर्णले प्रधानमन्त्रीसँग सोधेको प्रश्नलाई पनि तोडमोड गरेर आफू विरुद्ध भ्रम फैलाइएको बताए । आफूले समान कानुनी मापदण्डबारे प्रश्न उठाएको स्पष्ट पार्दै कर्णले ‘बालुवाटार जलाउने धम्की’ दिएको भन्ने आरोप असत्य भएको बताए । यदि त्यस्तो प्रमाण भए कानुनी कारबाही भोग्न तयार रहेको उनको भनाइ छ ।

साइबर ब्युरोले उजुरी दर्ता भइसकेको पुष्टि गर्दै घटनाबारे अनुसन्धान सुरु गरिएको जनाएको छ। डिजिटल माध्यममार्फत हुने मानहानि, गलत सूचना र दुरुपयोगका घटनामा कडा निगरानी राखिएको र दोषी पहिचान भएपछि प्रचलित कानुनअनुसार कारबाही गरिने ब्युरोले जनाएको छ।

नेपालमा पछिल्लो समय सामाजिक सञ्जालमार्फत हुने साइबर अपराधका घटनाहरू बढ्दो क्रममा रहेको अवस्थामा यस्ता उजुरीहरूले नियन्त्रण तथा सचेतना बढाउन सहयोग पुग्ने अपेक्षा गरिएको छ।